Քաղաքական անցուդարձ. համառոտ
Կապիտալ ,
Արմենպրես
 |
| Ալ. Իսկանդարյան. «Հայ-թուրքական հարաբերությունների նորմալացումը լուրջ փոփոխությունների կհանգեցնի տարածաշրջանում»։ |
Ալ. Իսկանդարյան. Հայ-թուրքական հարաբերությունների նորմալացումը լուրջ փոփոխությունների կհանգեցնի տարածաշրջանում
Հայ-թուրքական հարաբերությունների նորմալացումը լուրջ փոփոխությունների
կհանգեցնի տարածաշրջանում: Ինչպես երեկ լրագրողների հետ հանդիպման ժամանակ
նշեց Կովկասի ինստիտուտի տնօրեն Ալեքսանդր Իսկանդարյանը, հայ-թուրքական
սահմանի բացման դեպքում կտրուկ կփոխվի Վրաստանի դերը: Այդ երկրի
տարածքով փոխադրումների ծավալը, ըստ տնտեսագետների, կնվազի մոտ 40
տոկոսով: Իսկանդարյանի խոսքով, դժվարություններ կառաջանան Կարս-Ախալքալաք
ճանապարհի կառուցման գործում:
Իրանի պարագայում լուրջ հնարավորություններ
կստեղծվեն Մեղրի-Բավրա-Բաթում ճանապարհի կառուցման դեպքում: Ադրբեջանը
հստակ գիտակցում է, որ հայ-թուրքական հարաբերությունների նորմալացման
պարագայում իր դերը կնվազի:
«Հայ-թուրքական հարաբերությունների
նորմալացումը տարածաշրջանում կայունություն կհաստատի: Երկու երկրների
միջև բաց սահմանի դեպքում վիճակն ավելի կայուն կլինի, քան նախկինում»,-
նշեց Ալ.Իսկանդարյանը: Նրա խոսքով՝ Թուրքիայի խորհրդարանի կողմից
արձանագրությունների վավերացման տարբեր ժամկետներ կարող են լինել: Դրանք
կարող են վավերացվել շատ շուտ կամ ձգվել մինչև 2011թ., երբ Թուրքիայում
կանցկացվեն ընտրություններ:
Ըստ Ալ. Իսկանդարյանի՝ հայ-թուրքական
հարաբերությունների կարգավորմանն ուղղված գործընթացը առաջ է գնում, իսկ թե
ինչպիսի ելք կունենա, դժվար է ասել: Նրա խոսքով, դատելով իշխանության
հայտարարություններից, որոշում է ընդունվել սպասել, որ Թուրքիան վավերացնի
արձանագրությունները, այնուհետև անել դա հայկական խորհրդարանում:
Անդրադառնալով Ադրբեջանում հակաթուրքական տրամադրություններին՝ Ա.
Իսկանդարյանը նշեց, որ դա նորություն չէ: «Հայաստանի հետ
հարաբերությունների նորմալացմանն ուղղված Թուրքիայի քայլը դժգոհություն է
առաջացրել Ադրբեջանում, սակայն դա չի նշանակում, որ այդ երկու երկրները
դադարում են լինել դաշնակից»,- եզրափակեց Կովկասի ինստիտուտի տնօրենը:
Համանախագահները տարածաշրջան կգան նոյեմբերի սկզբին
ԵԱՀԿ-ի Մինսկի խմբի համանախագահներ Յուրի Մերզլյակովի, Բեռնար Ֆասյեի և Ռոբերտ Բրադտկեի հերթական այցը տարածաշրջան տեղի կունենա նոյեմբերի սկզբին: Այս մասին հայտնում է ԵԱՀԿ պաշտոնական կայքը: Այցի հարցը հոկտեմբերի 26-ին քննարկվել Է Լյուքսեմբուրգում Մինսկի խմբի համանախագահների հետ Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հանդիպմանը: Հաղորդագրության մեջ ասված Է, որ այցի շրջանակներում համանախագահները կհանդիպեն Ադրբեջանի և Հայաստանի նախագահների հետ: Հանդիպումների ընթացքում կշարունակվի հիմնարար սկզբունքների հիման վրա ղարաբաղյան հակամարտության կարգավորման գործընթացի քննարկումը:
ԲԱԺԱՆՈՐԴԱԳՐՎԵԼ
