Մեկնարկում է DigiTec-ը 
Կմասնակցեն նաև թուրքական ընկերություններ

Սամվել Ավագյան

Երևանում այսօր մեկնարկում է DigiTec 5-րդ ամենամյա ցուցահանդեսը:

Երևանում այսօր մեկնարկում է DigiTec 5-րդ ամենամյա ցուցահանդեսը: Ակնկալվում է, որ ցուցահանդեսը կունենա մոտ 50 մասնակից և 12 հազ. այցելու:

Սպասվում է մի շարք արտասահմանյան ընկերությունների մասնակցությունը՝ Ericsson, Sun Microsystems, Microsoft, National Instruments և այլն: Կմասնակցեն նաև թուրքական ՏՏ ընկերություններ:

Սակայն Ինֆորմացիոն տեխնոլոգիաների ձեռնարկությունների միության տնօրեն Կարեն Վարդանյանն ասում է, որ թուրքերը նախընտրել են Վրաստանում կազմակերպվող էլեկտրոնային կառավարման վերաբերյալ մրցանակաբաշխությունը:

Ցուցահանդեսի ժամանակ կցուցադրվեն մի շարք նորարարություններ:

Մասնավորապես, շվեդական Ericsson-ը հայկական «Յուքոմ» ընկերության հետ համատեղ ներկայացնելու է IP հեռուստատեսությունը: «Յուքոմի» տնօրեն Հայկ Եսայանը երեկ լրագրողներին տեղեկացրեց, որ ստեղծելու են գերհզոր օպտիկամանրաթելային ցանց, որով միաժամանակ հնարավորություն կլինի մատուցել երեք ծառայություն՝ ինտերնետ, հեռախոսակապ, IP հեռուստատեսություն:

Վերջինս նոր սերնդի թվային հեռուստատեսություն է, աշխարհում առաջինը փորձարկվելու է Հայաստանում, երկրորդը՝ Չինաստանում: Այն հեռուստադիտողին հնարավորություն է տալիս ինտերակտիվ շփվել հեռուստացույցի հետ:

«Այսօր հեռուստատեսությունը միայն ցուցադրում է, իսկ IP-ն հնարավորություն է տալիս նաև հաղորդակցվել»,- ասում է Եսայանը: Նշենք, որ օպտիկամանրաթելային մալուխն ի վիճակի է ապահովել մինչև 1 գբիտ/վայրկյան արագությամբ տվյալների փոխանակում:

Առանձին տաղավարներով ներկայացվելու են նաև ՏՏ ոլորտում իրականացվող այնպիսի ծրագրեր, որոնց իրականացմանն աջակցում է ՀՀ կառավարությունը, մասնավորապես՝ «Գյումրիի տեխնոպարկ», «Համակարգիչ բոլորի համար», «Հայաստանի ողջ տարածքում ինտերնետային ծածկույթի ապահովում», պետական կառավարման մարմիններում էլեկտրոնային համակարգի ներդրում (էլեկտրոնային եղանակով հարկային փաստաթղթերի ներկայացում և այլն):

Նշենք, որ ցուցահանդեսն անցկացվում է ՀՀ վարչապետի բարձր հովանու ներքո: