Հոկտեմբերը լինելու է խաղաղության ամիս
Դավութօղլուն Թուրքիա-Հայաստան հարաբերություններում առաջընթաց է ակնկալում

Պատրաստեց Սասուն Խաչատրյանը

«Հայ-թուրքական հարաբերությունների կարգավորման գործընթացը շարունակվելու է, և հոկտեմբերը լինելու է խաղաղության ամիս»։

Թուրքիայի արտգործնախարար Ահմետ Դավութօղլուն հայտարարել է, որ ստորագրվելիք հայ-թուրքական արձանագրությունները երկրի խորհրդարան կներկայացվեն մինչև հոկտեմբերի 14-ը Բուրսայում կայանալիք աշխարհի առաջնության Թուրքիա-Հայաստան ֆուտբոլային հանդիպումը:

Այս մասին հաղորդում է թուրքական Zaman թերթը:

«Հայ-թուրքական հարաբերությունների կարգավորման գործընթացը շարունակվելու է, և հոկտեմբերը լինելու է խաղաղության ամիս»,- ասել է Թուրքիայի արտգործնախարարը՝ նյույորքյան իր այցից հետո Անկարայում հրավիրած ասուլիսին:

Դավութօղլուն անդրադարձել է նաև իրանական խնդրին՝ ասելով, որ Թուրքիան կանի ամեն հնարավորը, որպեսզի կանխի Իրանի նկատմամբ պատժամիջոցների սահմանումը:

«Պատժամիջոցները վնաս կհասցնեն և՛ Իրանի բնակչությանը, և՛ նրա հարևաններին, այդ թվում՝ Թուրքիային: Այնպես որ, մենք պետք է ակտիվացնենք մեր ջանքերը և կանխենք պատժամիջոցները»,- ասել է նա՝ հավելելով, որ ինքը և վարչապետ Էրդողանն այս ամիս կայցելեն Թեհրան: