Վրաստանը վաճառում է Հայաստան եկող ինտերնետ մալուխը
Մալուխը տնօրինող ընկերությունը վաճառվում է շուրջ $14 մլն-ով

Արմենակ Չատինյան

«Վրացական երկաթուղի» ընկերությունը վաճառում է իրեն պատկանող Railway Telecom ընկերության 100% բաժնետոմսերը։

«Վրացական երկաթուղի» ընկերությունը վաճառում է իրեն պատկանող Railway Telecom ընկերության 100% բաժնետոմսերը։ Ընկերության աճուրդի մեկնարկային գինը սահմանվել է $14,145 մլն։

Հաղթողը պարտավոր է երեք տարվա ընթացքում երկաթգծի երկայնքով իրականացնել օպտիկամանրաթելային մալուխի մոնտաժային աշխատանքները և «Վրացական երկաթուղուն» տրամադրել մալուխի մեկ զույգը։ Մրցույթում մասնակցելու հայտերը կընդունվեն նոյեմբերի 16-ին. նույն օրը կիրականացվի աճուրդը։

Հեռահաղորդակցության ոլորտում մասնագիտացում ունեցող Railway Telecom ընկերությունը հիմնադրվել է 2004թ.։ Այն ներկայումս տնօրինում է վրացական երկաթգծի երկայնքով անցնող 600 կմ օպտիկամանրաթելային մալուխը, որի միջոցով իրականացվում է երկաթուղու կապը, ինչպես նաև ինտերնետ ծառայություններ։

Մալուխը կառուցվել է 2000թ. Եվրամիության €17 մլն գրանտային միջոցներով՝ Հարավային Կովկասում երկաթուղու անվտանգության և հուսալիության նպատակով: Գրանտը հավասարաչափ բաշխվել է Հայաստանի, Վրաստանի և Ադրբեջանի միջև։

Վրացական երկաթուղու երկայնքով անցնող մալուխի միջոցով Հայաստան ինտերնետ է ներկրում Fibernet Communications ընկերությունը, որը տնօրինում է հայկական երկաթուղու երկայնքով անցկացված օպտիկամանրաթելային մալուխը և Հայաստանի ինտերնետի մեծածախ շուկայի առաջատարն է։

Չի բացառվում, որ վրացական մալուխը տնօրինող ընկերության վաճառքը որոշակի բարդություններ հարուցի Fibernet-ի համար. հայկական ընկերությունը կարող է ստիպված լինել նոր պայմաններով նոր պայմանագրեր կնքել:

Մյուս կողմից՝ հայ ներդրողների համար սա լավ հնարավորություն է. Railway Telecom-ի բաժնետոմսերի վաճառքին կարող է մասնակցել ցանկացած ընկերություն: Գնելով վրացական մալուխը՝ Հայաստանի հեռահաղորդակցության ընկերությունները կարող են բարձրացնել Հայաստանի ինտերնետ կապի հուսալիությունը և մանևրել ինտերնետի մեծածախ շուկայում, որտեղ օրեցօր թեժանում է մրցակցությունը։