Կոռուպցիան՝ 5-րդ տեղում
Հայաստանի բնակիչների համար ավելի առաջնահերթ են գործազրկության ու գնաճի խնդիրները

Կապիտալ

Հասարակության կարծիքով՝ կոռուպցիայի մակարդակը Հայաստանում նվազել է։

Հայաստանում կոռուպցիոն դեպքերը որոշակիորեն նվազել են ոստիկանության և մաքսային համակարգերում:

Ըստ «Արմենպրեսի»՝ նման տեսակետ է հայտնել Եվրասիա համագործակցության հիմնադրամի Հետազոտական ռեսուրսների կովկասյան կենտրոնի (ՀՌԿԿ) հայաստանյան գրասենյակի տնօրեն Հեղինե Մանասյանը Հայաստանում հասարակության վերաբերմունքը կոռուպցիայի նկատմամբ պարզելու նպատակով 2008թ. սեպտեմբեր-հոկտեմբեր ամիսներին իրականացված ուսումնասիրության արդյունքները ներկայացնելիս:

Ըստ նրա՝ բնակիչները լուրջ խնդիր են համարում կոռուպցիան, սակայն շատ քչերն են տեղյակ պետության, հասարակական կազմակերպությունների կողմից իրականացվող հակակոռուպցիոն ծրագրերի մասին:

Հասարակության կողմից նշված առաջնային լուրջ խնդիրների ցանկում կոռուպցիան 5-րդ հորիզոնականն է զբաղեցնում: Մարդիկ առաջնահերթություն են համարում գործազրկության, աղքատության, գնաճի վերաբերյալ հարցերը:

Ըստ հետազոտության տվյալների՝ հարցման մասնակիցների 86 տոկոսը կոռուպցիան համարում է լուրջ հիմնախնդիր: Ընդհանուր առմամբ կոռուպցիայի մակարդակը շարունակում է բարձր մնալ դատական մարմիններում, ընտրական, ոստիկանության, առողջապահության և կրթության համակարգերում:

Մարդկանց մոտ կոռուպցիայի վերաբերյալ ընկալումները տարբեր են եղել, հարցվածների 49 տոկոսը կարծում է, որ բժշկին տված նվերը կոռուպցիա չէ, իսկ 48 տոկոսը ճիշտ հակառակն է կարծում:

«Կոռուպցիոն վարքագծի առնչությամբ փոքր-ինչ հուսադրող է այն փաստը, որ թեև հարցվողների 53 տոկոսը պատրաստակամ է կաշառք տալ, եթե պահանջեն, ապա 72 տոկոսն այն չի ընդունի: Որոշ դեպքերում մարդիկ կաշառք տալը նորմալ են համարում առաջացած խնդիրները լուծելու համար»,- ասել է Հ. Մանասյանը:

Նա առավել մտահոգիչ է համարել այն հանգամանքը, որ հարցվածների ավելի քան կեսը հավատացած է, որ կոռուպցիան կրճատելու ուղղությամբ անձամբ ոչինչ չի կարող անել:

Մայրաքաղաքում բնակիչները փոքր-ինչ թերահավատորեն են մոտենում ՀՀ կառավարության կողմից իրականացվող հակակոռուպցիոն ծրագրերին, սակայն մարզերում հարցվածների շուրջ 60 տոկոսը հակառակ կարծիքի է:

Հասարակության կարծիքով՝ կոռուպցիայի մակարդակը Հայաստանում նվազել է. հարցվածների 30 տոկոսը հավատացած է, որ նախորդ տարվա համեմատ պակասել են կոռուպցիոն դեպքերը:

ՀՌԿԿ-ի հարցման մեջ ընդգրկվել է Երևանից և մարզերից 18 տարեկանից բարձր 1549 մարդ: Ըստ Հ. Մանասյանի՝ ուսումնասիրությունը կնպաստի Հայաստանի կառավարության և հասարակական կազմակերպությունների կողմից կոռուպցիայի դեմ պայքարի արդյունավետ իրականացմանը: