Անհատական համակարգիչների արտադրությամբ զբաղվող չինական խոշորագույն Lenovo Group ընկերության զուտ շահույթը 2009-2010 ֆինասնական տարվա 3-րդ եռամսյակում (ավարտվել 2009թ. դեկտեմբերի 31-ին) կազմել է $80 մլն՝ համեմատ նախորդ ֆինասնական տարվա նույն ժամանակահատվածի $97 մլն զուտ վնասի։ Այս մասին նշվում է ընկերության՝ այսօր հրապարակած ֆինասնական հաշվետվությունում։

Հաշվետու ժամանակահատվածում ընկերության վաճառքներն ավելացել են 33,2%-ով՝ մինչև $4,78 մլրդ՝ համեմատ նախորդ տարվա $3,59 մլրդ ցուցանիշի։ Մինչև հարկումը 2009-20010 ֆինտարվա 3-րդ եռամսյակի շահույթը կազմել է $99 մլն՝ համեմատ նախորդ $91 մլն վնաս ցուցանիշի։

Lenovo-ում դրական տվյալները պայմանավորում են ընկերության վերկառուցման ծրագրով՝ որի հիմքում ծախքերի կրճատումն ու ընթացիկ գործունեության արդյունավետության բարձրացումն է։

Նշենք, որ Lenovo-ն միջազգային տեխնոլոգիական ընկերություն է, որը կազմավորվել է 2005թ. ամերիկյան IBM կորպոռացիայի հաշվողական տեխնիկայի ստորաբաժնումների ձեռքբերումից հետո ու դրանց հիմքի վրա։ Ընկերությունն այժմ մասնագիտանում է անհատական համակարգիչների, ինչպես նաև մասնագիտական ծառայությունների առաջարկման ոլորտում։ Արտադրանքը Lenovo-ն կորպորատիվ հաճախորդներին մատակարարում է սեփական ներկայացուցչությունների միջոցով, տեղակայված աշխարհի տարբեր երկրներում։ Ընկերության ընդհանուր աշխատակազմը գերազանցում է 19 հազ. մարդը։